Ջոն Քերին լքում է Ջո Բայդենի վարչակազմը

ԱՄՆ նախագահի կլիմայի հարցերով հատուկ ներկայացուցիչ Ջոն Քերին պատրաստվում է այս ձմռանը թողնել իր պաշտոնը և շարունակել օգնել Ջո Բայդենին նախընտրական քարոզարշավում։ Այս մասին գրում է Reuters գործակալությունը։

Քերին ԱՄՆ նախագահ Ջո Բայդենի հետ հանդիպել է հունվարի 10-ին, որտեղ էլ ԱՄՆ ղեկավարին հայտնել է հրաժարական տալու իր մտադրության մասին: Մի քանի օր անց հատուկ բանագնացն իր խորհրդականներին հավաքել է «հապճեպ կազմակերպված» խորհրդակցության, որտեղ հայտարարել է վարչակազմից հեռանալու իր որոշման մասին։

80-ամյա Քերին նշել է, որ հաշվի առնելով ընտրությունների տարի լինեը՝ հրաժարական է տալիս, բայց չի թողնի կլիմայի խնդիրների հարցը։ NBC News-ին նա նաև ասել է, որ կանի ամեն ինչ՝ օգնելու նախագահ Բայդենի վերընտրմանը։

Axios-ի աղբյուրները մանրամասնում են, որ Քերին Բայդենի վերընտրությունը համարում է երկրի ներսում և ամբողջ աշխարհում կլիմայի ոլորտում առաջընթացի հարցում ամենամեծ փոփոխությունը։

Հիշեցնենք` ԱՄՆ նախագահական ընտրությունները նշանակված են 2024 թվականի նոյեմբերի 5-ին։