Իսպանիան` Կարմիր ծովում նավերի պաշտպանության գործողությանն իր մասնակցության մասին

Իսպանիան չի արգելափակի Կարմիր ծովում առևտրային նավերը Իրանի աջակցությունն ստացող շարժման հարձակումներից պաշտպանելու Եվրամիության հնարավոր գործողությունը, բայց չի պատրաստվում մասնակցել դրան: Այս մասին հայտարարել է Թագավորության վարչապետ Պեդրո Սանչեսը իսպանական Pais թերթին տված հարցազրույցում, փոխանցում է «ՌԻԱ Նովոստի»-ն:

«Մենք ունենք ավելի քան 3000 զինվոր, որոնք ներգրավված են տարբեր առաքելություններում... Իհարկե, մենք չենք պատրաստվում առարկել, որ ԵՄ Խորհուրդը սկսի այս նոր առաքելությունը։ Սակայն մենք մտադիր չենք մասնակցել դրան, քանի որ կարծում ենք, որ արդեն ներկա ենք այլ միջազգային առաքելություններում, և որ այդ առաքելությունը պետք է ղեկավարեն այլ երկրներ»,- հայտարարել է Սանչեսը ։

Նշենք, որ ավելի վաղ Պենտագոնի ղեկավար Լլոյդ Օսթինը հայտարարել էր Եմենի հուսի ապստամբների կողմից առևտրային նավերի վրա հարձակումների ֆոնին Կարմիր ծովի և Ադենի ծոցի պաշտպանության «Բարգավաճման պահապան» բազմազգ գործողության մեկնարկի մասին: