ԱՄՆ-ն մերժում է Գազայից պաղեստինցիներին վտարելու իսրայելցի պաշտոնյաների առաջարկը

ԱՄՆ-ը մերժում է իսրայելցի պաշտոնյաների հայտարարությունները, որոնք կոչ են անում վերաբնակեցնել պաղեստինցիներին Գազայի սահմաններից դուրս։

Այս մասին ասել է ԱՄՆ պետքարտուղար Էնթոնի Բլինքենը։

Նրա խոսքով` պաղեստինցիները պետք է կարողանան տուն վերադառնալ, երբ պայմանները թույլ տան։

«Մենք մերժում ենք իսրայելցի որոշ նախարարների և օրենսդիրների հայտարարությունները, որոնք կոչ են անում վերաբնակեցնել պաղեստինցիներին Գազայի սահմաններից դուրս», - ասել է Բլինքենը Կատարի վարչապետ և արտաքին գործերի նախարար Մուհամեդ բեն Աբդերահման Ալ Թանիի հետ համատեղ մամուլի ասուլիսի ժամանակ։

Նախկինում ԱՄՆ-ը, Ֆրանսիան, Գերմանիան և Մեծ Բրիտանիան արդեն դեմ էին արտահայտվել Իսրայելի իշխանությունների հայտարարություններին Գազայի հատվածից պաղեստինցիներին վտարելու անհրաժեշտության մասին։ ԵՄ դիվանագիտության ղեկավար Ժոզեփ Բորելը դատապարտել է Իսրայելի ներքին անվտանգության նախարար Իտամար Բեն-Գվիրի և ֆինանսների նախարար Բեզալել Սմոտրիչի հայտարարությունները Գազայի բնակիչների վերաբնակեցման վերաբերյալ։