ՌԴ ԶՈւ-ում ծառայության անցնող օտարերկրացիները ՌԴ քաղաքացիություն կստանան
ՌԴ նախագահ Վլադիմիր Պուտինը հրամանագիր է ստորագրել զինված ուժերում ծառայելու պայմանագիր կնքած օտարերկրացիներին ՌԴ քաղաքացիություն տալու մասին։ Այս մասին տեղեկանում ենք ռուսական լրատվամիջոցներից:
«Հատուկ ռազմական գործողության ընթացքում Ռուսաստանի Դաշնության զինված ուժերում կամ զինվորական կազմավորումներում զինվորական ծառայության պայմանագիր կնքած օտարերկրյա քաղաքացիները իրավունք ունեն դիմել Ռուսաստանի Դաշնության քաղաքացիություն ստանալու»,- ասվում է հրամանագրում։
Ռուսական անձնագիր կարող են ստանալ նաև այն օտարերկրացիները, ովքեր հատուկ գործողության ընթացքում զինվորական ծառայություն են անցնում զինված ուժերում կամ զորամասերում, ինչպես նաև նույն ժամանակահատվածում բանակից թոշակի անցած զինվորականները։
Հաղորդվում է, որ նույն իրավունքն ունեն օտարերկրյա քաղաքացիություն ունեցող զինծառայողների կանայք կամ ամուսինները և երեխաները:
