Ե՞րբ կսկսվի Երասխ-Օրդուբադ-Մեղրի-Հորադիս երկաթուղու ենթակառուցվածքների թերությունները վերացնելու գործընթացը
Երասխ-Օրդուբադ-Մեղրի-Հորադիս երկաթուղու հետ կապված որշակի հաշվարկներ կան: Այս մասին լրագրողների հետ հանդիպմանն ասել է ՀՀ տարածքային կառավարման և ենթակառուցվածքների նախարար Գնել Սանոսյանը։
«Երասխի հատվածում, եթե ճիշտ եմ հիշում, մոտ 1 կիլոմետրի չափ է, որ շինարարական աշխատանք իրականացնելու կարիք կա, Մեղրիի՝ ամբողջ հատվածը։ Մենք որոշակի հաշվարկներ ունենք, ընդ որում, մենք սկզբնական փուլում՝ 2021 թվականին, ունեինք նախնական հաշվարկներ, հետագայում Ճարտարապետաշինարարական համալսարանին ենք պատվիրել, որ ավելի մանրակրկիտ աշխատանք անեն, ու խումբը լավ աշխատանք է արել»,- ասել է նա։
Սանոսյանի խոսքով՝ եթե քաղաքական որոշումները գան հանգուցալուծման, ապա կսկսվի ենթակառուցվածքներում առկա թերությունները վերացնելու գործընթացը։
Հիշեցնենք՝ ՀՀ փոխվարչապետ Մհեր Գրիգորյանը հայտարարել էր, որ ապաշրջափակման գործընթացը սկսվում է Երասխ-Հորադիս երկաթգծի վերաշահագործումից։
