«Շատ մի՛ բզբզացեք, որ մյուս գերիներն էլ վերադառնան»․ ՔՊ պատգամավոր

Այս պահին իշխանությունը շարունակում է մյուս գերիներին վերադարձնելու աշխատանքները։ Անհրաժեշտ գործողություններն իրականացվում են, բանակցություններ են գնում, որ մնացածին էլ բերենք։ Այս մասին այսօր MediaHub-ի հետ զրույցում ասել է «Քաղաքացիական պայմանագիր» խմբակցության պատգամավոր Գագիկ Մելքոնյանը։

«Երկուստեք հայտարարություն եղավ, չէ՞, ուրեմն այդ մարդիկ էլ բանակցություններ են տանում՝ Կառավարության մակարդակով»,- ասել է պատգամավորը՝ պատասխանելով լրատվամիջոցի այն հարցին, թե կոնկրետ ովքեր են բանակցում։

Հարցին՝ կոնկրետ քանի հայ գերի է պահվում Ադրբեջանում, վերջինս պատասխանեց, որ տեղյակ չէ։

Դիտարկմանը՝ համարժե՞ք էր ՀՀ-ում մարդ սպանած ադրբեջանցի զինծառայողին, ով ցմահ ազատազրկման էր դատապարտվել, Ադրբեջան վերադարձնելը, վերջինս արձագանքել է․ «Հիմա բզբզում եք՝ համարժեք էր, համարժեք չէր։ Հիմա 32-ին բերել ենք, 2-ին էլ փոխարենը տվել ենք, թողե՛ք, էդ մարդիկ հանգիստ մնան։ Շատ մի՛ բզբզացեք, որ մյուս գերիներն էլ վերադառնան»։