ԼՂ–ից բռնահանվածներից հիմա կան շատ բողոքներ, որ սոցիալական շատ կարիքներ ուղղակի չեն հոգում․ Արթուր Խաչատրյան
ՀՀ ԱԺ–ում 2024 թ. պետական բյուջեի նախագծի 2–րդ ընթերցման քննարկման ժամանակ ՀՀ ֆինանսների նախարար Վահե Հովհաննիսյանին հարց ուղղեց ՀՀ ԱԺ «Հայաստան» խմբակցության պատգամավոր Արթուր Խաչատրյանը՝ ինչո՞ւ է ՀՀ պահուստային ֆոնդը մեծանում, արդյոք այդ գումերներն ուղղակի չեն «քնեցվում»։
«ՀՀ կառավարությունը միշտ էլ հնարավորություն ունի բյուջեի տողերի մեջ վերաբաշխում կատարել։ Ընդամենը 10 օր առաջ եկաք, դիմեցիք ու 3 տոկոսի փոխարեն 6 տոկոսով շեմը փոխարինեցիք և հրատապ ծախսերն ավելացրիք։ 186 մլրդ դրամ «քնեցնելը» արդյոք չի՞ նշանակում, որ ՀՀ կառավարությունը պարտք է վերցնում, հարկերն ու տուրքերն է ավելացնում, ժողովրդին սարքում է «տուգանքի մատերիալ», սակայն չի իմանում, թե ինչպես ծախսի առկա գումարները` օրը կբացվի, բարին հետը տրամաբանությամբ»,–հարցրեց Խաչատրյանը։
Ֆինանսների նախարար Վահե Հովհաննիսյանը նշեց, որ բյուջեի` 1–ին ընթերցման ժամանակ ասել էին, որ 2–րդ ընթերցման ժամանակ կներկայացնեն ԼՂ–ից բռնի տեղահանվածների համար ծրագրեր և համապատասխան ավելացում։
«Հիմա այդ նպատակով նախատեսել ենք 47 մլրդ դրամ չափով։ Ասել ենք` այն ծրագրերը, որոնք դեռ չենք կարող իրականացնել, կնախատեսենք պահուստում և հետո, երբ բնակարանային, աշխատանքի տեղավորման և այլ ծրագրերը պատրաստ կլինեն, պահուստից կտրամադրենք»,– ընդգծեց նախարարը։
Արթուր Խաչատրյանն էլ նշեց, որ պահուստային ֆոնդի մեծացումն այնքան էլ գովելի բան չէ, քանի որ դա նշանակում է` չգիտեք ինչպես բաշխել գումարները, եթե անգամ դրանք լավ նպատակների համար են։
«Ինչպես հասկանում եմ` Արցախին ուղղված վարկային նախկին գումարները հիմա ուղղվելու են նրանց կարիքները բավարարելու համար։ Սեպտեմբերի 19–ից հետո ՀՀ կառավարությունը բավականաչափ ժամանակ ուներ` հասկանալու համար, թե ինչպես է այդ մարդկանց կարիքները հոգալու, քանի որ նրանցից հիմա կան բավականին շատ բողոքներ, որ սոցիալական շատ կարիքներ ուղղակի չեն հոգում»,– ասաց պատգամավորը։
Նախարարի խոսքով` պահուստներն ընդամենը հավելյալ բուֆերներ են, որպեսզի տարվա ընթացքում եթե ռիսկերի մասին ՀՀ կառավարության սցենարները նյութականացվեն, ոչ մի ցնցման չենթարկվենք։
