Ապացուցեցինք, որ երեք երկիրն էլ սխալվել են․ այս հակամարտությունը ռազմական լուծում ունի. Ալիև
Ադրբեջանը ցույց տվեց, թե ինչպես կարելի է խաղաղության հասնել ռազմական ուժի միջոցով։ Այս մասին հայտարարել է Ադրբեջանի նախագահ Իլհամ Ալիևը: Տեղեկությունը փոխանցում են ադրբեջանական լրատվամիջոցները։
«Մենք արդեն խաղաղություն ենք հաստատել տարածաշրջանում։ Մենք դա արել ենք ռազմական ճանապարհով։ Կարծում եմ՝ սրան պետք է ավելի շատ ուշադրություն դարձնել։ Դա վերաբերում է ոչ միայն Կովկասին։ Մենք ցույց ենք տվել, թե ինչպես կարելի է խաղաղության հասնել ռազմական ուժի միջոցով»,- ասել է Ալիևը՝ «Ղարաբաղ. վերադարձ տուն 30 տարի անց. ձեռքբերումներ և մարտահրավերներ» միջոցառման ընթացքում:
«Օկուպացիայի ժամանակ Մինսկի խմբի համանախագահները եկան միաձայն կարծիքի, որ այս հակամարտությունը ռազմական լուծում չունի: Մենք ապացուցեցինք, որ երեք երկիրն էլ սխալվել են։ Չնայած իրենց պետականության պատմությանը, միջազգային փորձին և ՄԱԿ-ի Անվտանգության խորհրդին անդամակցությանը, նրանք սխալվեցին։ Սա սխալ գնահատական էր։ Սա մեսիջ էր Ադրբեջանին, որ եթե փորձես ռազմական ճանապարհով հակամարտությունը լուծել, հաջողության չես հասնի։ Բայց մենք ապացուցել ենք, որ այս հակամարտությունը ռազմական լուծում ունի։ Այս հակամարտությունը լուծվել է 3 տարի առաջ»,- ասել է Ադրբեջանի նախագահը։
