Իսրայելական բանակը ինտենսիվ գնդակոծում է Գազայի հատվածը. ռմբակոծվել են առնվազն 14 հիվանդանոցներ

Իսրայելի պաշտպանության ուժերը ինտենսիվ հրետանային կրակ են բացում և թիրախավորում են Գազայի հատվածի հիվանդանոցները։ Այս մասին հայտնում է լիբանանյան Al Mayadeen հեռուստաալիքը։

Նրա խոսքով՝ իսրայելցի զինվորականները «շարունակական հրետանային ռմբակոծություններ են իրականացնում Գազայի արեւելյան շրջանների ուղղությամբ»։ Ալ-Տուֆա շրջանում արկը ընկել է գազալցակայանի վրա և հրդեհ է բռնկվել, որից հետո մի քանի մարդ զոհվել և վիրավորվել է։

Բացի այդ, հեռուստաալիքը պնդում է, որ իսրայելական բանակը «լայնածավալ ռմբակոծություններ է իրականացրել Գազայի հատվածի առնվազն 14 հիվանդանոցների ուղղությամբ, որոնք հիմնականում գտնվում են տարածաշրջանի հյուսիսում»։

Հավելենք նաև` Գազայի հատվածում հակամարտության մեկնարկից ի վեր սպանվել է ավելի քան 15 և կես հազար մարդ: Այդ մասին հայտարարել է պաղեստինյան անկլավի առողջապահության նախարարության պաշտոնական ներկայացուցիչ Աշրաֆ ալ-Քուդրան։ Անկախ աղբյուրները չեն կարող ընթացող պատերազմի պայմաններում պարզել այդ հաղորդագրության արժանահավատությունը: «Իսրայելական ագրեսիայի զոհերի թիվը հասել է 15 հազար 523-ի, տուժել է առնվազն 41 հազար 316 մարդ»,- ասվում է գերատեսչության ֆեյսբուքյան էջում տեղադրված հաղորդագրության մեջ։

Ըստ Գազայի առողջապահության նախարարության՝ հոկտեմբերի 7-ին սկսված հակամարտության ընթացքում զոհվել է 291 բուժաշխատող, ոչնչացվել է շտապօգնության 56 մեքենա և նույնքան բուժհաստատություն: Դեկտեմբերի 1-ի առավոտյան իսրայելյան բանակը «Համաս»-ին (Միացյալ Նահանգներում և Եվրամիությունում ճանաչվել է ահաբեկչական կազմակերպություն) մեղադրել է զինադադարը խախտելու համար և հայտարարել է ռազմական գործողությունները վերսկսելու մասին:

Նոր բախումը մեկնարկել է այն բանից հետո, երբ «Համաս»-ը հոկտեմբերի 7-ին վաղ առավոտյան անսպասելի հարձակվել է Իսրայելի խաղաղ բնակավայրերի վրա: Զոհված իսրայելցիների թիվը մոտ 1200 է: Կան հարյուրավոր պատանդներ, որոնցից տասնյակներ մի քանի օր տևած հրադադարի ընթացքում ազատ են արձակվել կալանավորված պաղեստինցիներին ազատելու դիմաց:

Արաբական և մահմեդական երկրներն Իսրայելին մեղադրում են Գազայում պատերազմի հանցագործություններ կատարելու համար և պահանջում են անհապաղ դադարեցնել ռազմական գործողությունը: Իսրայելը հերքում է մեղադրանքը և պնդում է, որ Գազայում պետք է հասնի առանցքային նպատակին և ամբողջությամբ ոչնչացնի ծայրահեղական «Համաս»-ի կառույցը:

Պաղեստինի Կարմիր մահիկի ընկերության շտապ օգնության ծառայության բժիշկներն ու հիվանդն էլ վիրավորվել են Գազայի հատվածի հյուսիսում գտնվող Ֆալուջայի շրջանում իսրայելցի զինվորականների հարձակման հետևանքով: