Գեներալ Գրիգորի Խաչատուրովն ազատ կարձակվի
Գեներալ Գրիգորի Խաչատուրովի նկատմամբ ընտրված խափանման միջոց կալանավորումը փոխարինվեց գրավով և վարչական հսկողությամբ։
Վերաքննիչ հակակոռուպցիոն դատարանը՝ դատավոր Արմեն Հովհաննիսյանի նախագահությամբ, մասնակի բավարարեց Գրիգորի Խաչատուրովի կալանավորման ժամկետը երկարացնելու որոշման դեմ բողոքը։
Պաշտպանության կողմի դիտարկմամբ՝ Գրիգորի Խաչատուրովի նկատմամբ բացարձակ որևէ խափանման միջոց կիրառելու որևէ հիմնավորում գոյություն չուներ։
«Այժմ պետք է դիտարկենք որոշման համատեքստում մեր գործողությունները, որոնք այս պահին հստակ չեն։ Գրիգորի Խաչատուրովն այս պահին տեղափոխվեց ՔԿՀ»,- լրագրողների հետ զրույցում ասաց Միհրան Պողոսյանը։
Նշենք, որ գրավի չափ է սահմանվել 20 մլն դրամը եւ Խաչատուրովն ազատ կարձակվի միայն գրավի գումարը դեպոզիտ հաշվին փոխանցելուց հետո։
Հիշեցնենք, որ քրեական գործը վերաբերում է հողատարածքի օտարմանը։ Գրիգորի Խաչատուրովի նկատմամբ քրեական հետապնդում է հարուցվել՝ պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացում) հատկանիշներով: Նկատենք, որ ըստ դատախազության, գործարքի առարկան չգործող զորամասի տարածքն է, որը պաշտպանության նախարար Սեյրան Օհանյանի պաշտոնավարման տարիներին, իբր, վաճառվել է Գրիգորի Խաչատուրովին, ինչը ձեւակերպվել է երրորդ անձի անվամբ։ Գործով մեղադրյալները 13-ն են, այդ թվում՝ ՊՆ նախկին նախարար Սեյրան Օհանյանը։
