Մերձավոր Արևելքում ինտենսիվ մարտերը կշարունակվեն առնվազն երկու ամիս. Իսրայելի ՊՆ ղեկավար

Իսրայելի պաշտպանության նախարար Յոավ Գալանտը ՀԱՄԱՍ-ի հետ ժամանակավոր զինադադարն անվանել է կարճատև դադար, որից հետո կվերսկսվեն ինտենսիվ մարտերը, գրում են The Times of Israel-ը և Haaretz-ը։

«Սա կլինի կարճատև դադար, որից հետո կշարունակվեն ինտենսիվ մարտերը։ Սպասվում է, որ առնվազն երկու ամիս մարտեր կլինեն»,- իսրայելցի զինվորականների հետ հանդիպման ժամանակ նախարարի խոսքերն է մեջբերում Haaretz-ը։

Գալանտը նաև ընդգծել է, որ շարունակական մարտերն անհրաժեշտ են պատանդներին ազատելու համար, որոնց, ըստ իսրայելցի նախարարի, ՀԱՄԱՍ-ը չի ազատի, մինչև Իսրայելը ճնշում չգործադրի խմբավորման վրա:

Հոկտեմբերի 7-ին Իսրայելի վրա ՀԱՄԱՍ-ի հարձակման հետևանքով զոհվել է առնվազն 1200 մարդ։ Գրոհայինները պատանդ են վերցրել մոտ 240 իսրայելցիների և օտարերկրացիների։ Նոյեմբերի 21-ին հայտնի դարձավ, որ կողմերը պայմանավորվածություն են ձեռք բերել, ըստ որի ռազմական գործողությունները Գազայի հատվածում չորս օրով կդադարեցվեն, և ՀԱՄԱՍ-ը կազատի 50 պատանդի՝ Իսրայելի բանտերում գտնվող 150 պաղեստինցի բանտարկյալների դիմաց։ Զինադադարը պետք է սկսվեր նոյեմբերի 23-ին, սակայն այն հետաձգվեց մինչև նոյեմբերի 24: