Երևակայության արդյունք. Իսրայելում չեն հավատացել հոկտեմբերի 7-ի արյունալի հարձակման նախազգուշացմանը
Իսրայելը հոկտեմբերի 7-ին ՀԱՄԱՍ-ի հարձակումը համարել է երևակայության արդյունք: Գազայի հատվածի հետ Իսրայելի սահմանին հերթապահող զինվորները, որոնք անընդհատ վերահսկում և վերլուծում էին անկլավից ստացվող տեսանյութերը և այլ տվյալներ, հարձակումից մի քանի շաբաթ առաջ մանրամասն զեկույց են ուղարկել Իսրայելի պաշտպանության բանակի հարավային հրամանատարության հետախուզության ղեկավարին: Այս մասին հայտնում է Financial Times-ը՝ հղում անելով աղբյուրներին։ Ռազմական պաշտոնյաներն ասում են, որ զեկույցը ներառում է մոտալուտ հարձակման նախազգուշացումներ, սակայն բարձրաստիճան սպան այդ տվյալները անվանել է «երևակայական սցենար»:
Նյութում նշվում էր, որ ՀԱՄԱՍ-ը պատրաստվում է պայթեցնել սահմանային կետերը մի քանի վայրերում, ներթափանցել Իսրայելի տարածք և գրավել կիբուցները։ Պաղեստինցի մարտիկները նաև պատանդ վերցնելու փորձեր են անցկացրել։ Ծառայողական զեկույցի պատճառը ՀԱՄԱՍ-ի առաջնորդներից մեկի հայտնվելն էր, ով հետևում էր ուսուցմանը: Նա անձերի տվյալների բազայի միջոցով ճանաչվել էր իսրայելցի սահմանապահների կողմից, սակայն դա չէր համոզել իշխանություններին:
