Ադրբեջանը «վճարում է»․ Բեգլարյանը՝ բանաձևի մասին, որով ԱՄՆ-ին արգելվում է ռազմական օգնություն տրամադրել Ադրբեջանին
Հաճելի է տեսնել, որ Սենատը միաձայն ընդունեց օրինագիծ, որը վերացնում է 907-րդ հոդվածից հրաժարվելու և Ադրբեջանին առնվազն 2 տարով ռազմական օգնություն տրամադրելու` ԱՄՆ նախագահի լիազորությունները: Այս մասին Արցախի նախկին պետնախարար Արտակ Բեգլարյանը գրել է X-ի իր միկրոբլոգում։
«Առաջին գործնական գինը, որ Ադրբեջանը վճարում է Հայաստանի և Արցախի դեմ իրականացրած ագրեսիաների և ցեղասպանության համար»,- նշել է նա։
Երեկ հայտնել էինք, որ նոյեմբերի 16-ին ԱՄՆ Սենատն ընդունել էր բանաձև, որով արգելվում է երկրին ռազմական օգնություն տրամադրել Ադրբեջանին։ Օրինագիծը նախագահին արգելում է առաջիկա երկու տարում հրաժարվել Ազատության աջակցության ակտի 907-րդ հոդվածից, որը ԱՄՆ կառավարությանն արգելել է Ադրբեջանի կառավարությանն ուղիղ օժանդակություն ցուցաբերել։
