Չէի հավատա Գազայից եկող որևէ բանի, ինչպես` Հյուսիսային Կորեայի պաշտոնատար անձանց տեղեկատվությանը. Լերներ
Իսրայելի պաշտպանության բանակի պաշտոնական ներկայացուցիչ Փիթեր Լերները ճեպազրույցի ժամանակ հայտարարել է, որ ինքը չի հավատում Գազայի հատվածում զոհված խաղաղ բնակիչների թվի մասին պաղեստինյան կողմի հրապարակած տվյալներին, սակայն Իսրայելցի զինվորականներն այդ մասին սեփական գնահատականներ չունեն:
«Ամբողջ տեղեկատվությունը, որը գալիս է Գազայից, շատ կոշտ գրաքննություն է անցնում։ Ես չէի հավատա որևէ բանի, որը գալիս է Գազայից, ինչպես չէի հավատա Հյուսիսային Կորեայի պաշտոնատար անձանց տեղեկատվությանը», - նշել է ՑԱԽԱԼ-ի ներկայացուցիչը և ավելացրել. «Ես կարծում եմ, որ զոհերի պաշտոնական թիվը կամ այլ տեղեկություններ չափազանց կասկածելի են»:
Ինչպես նշել է Լերները, խնդիրը բարդանում է նրանով, որ պաղեստինյան խմբավորումների գրոհայինները Իսրայելի պաշտպանության բանակի դեմ կռվում են ոչ թե զինվորական համազգեստով, այլ քաղաքացիական հագուստով:
