Այս պահին որևէ լրացուցիչ տեղեկություն չենք կարող հայտնել․ ՊՆ-ն՝ Ֆրանսիայից ռազմատեխնիկայի ենթադրյալ փոխադրումների մասին

Համացանցում տարածվում են վրացական Փոթի նավահանգստից ավելի քան 20 ֆրանսիական ACMAT Bastion զրահամեքենաների բեռնաթափման լուսանկարներ ու տեսանյութեր։ Նշվում է, որ դրանք, ենթադրաբար, պետք է փոխադրվեն Հայաստան։

Այս առնչությամբ Auroranews-ը կապ հաստատեց Հայաստանի պաշտպանության նախարարի մամուլի խոսնակ Արամ Թորոսյանի հետ։

«Հայաստանի և Ֆրանսիայի՝ պաշտպանության բնագավառում համագործակցության վերաբերյալ պաշտոնական հաղորդագրություններից և հայտարարություններից զատ այս պահին որևէ լրացուցիչ տեղեկություն չենք կարող հայտնել»,- նշեց Թորոսյանը։

Նշենք, որ ավելի վաղ Ադրբեջանի ԱԳՆ-ն հայտարարել էր, որ Հայաստանն ու Ֆրանսիան պետք է վերջ դնեն տարածաշրջանում սպառազինության և ռազմականացման քաղաքականությանը։ 

Հիշեցնենք՝ հոկտեմբերի 24-ին Ֆրանսիայի զինված ուժերի նախարար Սեբաստիեն Լըկորնյուն հայտարարել էր, որ Ֆրանսիան օգնում է Հայաստանին բարելավել հակաօդային պաշտպանության կարողությունները։