Հայաստանը և Ֆրանսիան պետք է վերջ դնեն սպառազինման և ռազմականացման քաղաքականությանը․ Ադրբեջանի ԱԳՆ
Հայաստանն ու Ֆրանսիան պետք է վերջ դնեն տարածաշրջանում սպառազինության և ռազմականացման քաղաքականությանը։ Այս մասին հայտարարել է Ադրբեջանի ԱԳՆ-ն։ Տեղեկությունը հայտնում են ադրբեջանական լրատվամիջոցները։
Ադրբեջանի արտաքին գործերի նախարարության մամուլի քարտուղար Այհան Հաջիզադեի խոսքով՝ Ֆրանսիայի զրպարտիչ հակաադրբեջանական արշավի և տարածաշրջանում նրա ապակառուցողական գործունեության ֆոնին Հայաստանի ռազմականացման քաղաքականությանը ծառայող քայլերը վկայում են, որ Փարիզը տարածաշրջանում հանդես է գալիս սխալ շահերով։
«Հայաստանը և Ֆրանսիան պետք է վերջ դնեն տարածաշրջանում սպառազինման և ռազմականացման քաղաքականությանը, այդ երկրները պետք է վերջապես հասկանան, որ տարածաշրջանում խաղաղությունն ու համագործակցությունն այլընտրանք չունեն»,- ասել է նա:
Հիշեցնենք՝ ավելի վաղ Երևանն ու Փարիզը ստորագրել են ռազմական մատակարարումների պայմանագիր։ Ռազմական վերլուծաբան և հետազոտող Լեոնիդ Ներսիսյանը X-ի իր միկրոբլոգում կիսվել է լուսանկարներով՝ գրելով, որ Հայաստանն արդեն ստացել է նախատեսված զրահատեխնիկան։
