Իսկապես դիտարժան էր. Սամբոյի միջազգային ֆեդերացիայի նախագահը՝ Երևանում անցկացված աշխարհի առաջնության մասին

Սամբոյի միջազգային ֆեդերացիայի (FIAS) նախագահ Վասիլի Շեստակովը խոսել է 2023 թվականի աշխարհի առաջնության մասին, որնց անցկացվեց Երևանում։

«Սամբոյի աշխարհի առաջնությունն իսկապես դիտարժան ստացվեց և մարզիկներին ու հանդիսատեսին պարգևեց նոր վառ հույզեր ու հաղթանակներ: Կցանկանայի նշել կամերունցի սամբիստ Սեյդու Նջիե Մուլուի հաջողությունը։ Շատ ուրախ եմ, որ մեդալներ նվաճած երկրների աշխարհագրությունը ընդլայնվում է»,- Շեստակովի խոսքերն է մեջբերում FIAS-ի մամուլի ծառայությունը։

Նա նաև իր երախտագիտությունն է հայտնել Հայաստանի սամբոյի ֆեդերացիային և աշխարհի առաջնության գլխավոր գործընկերներին սամբոյի 85-ամյակի Աշխարհի գավաթի կազմակերպման և անցկացման գործում ցուցաբերած աջակցության համար։

Մրցաշարն անցկացվել է Երևանում նոյեմբերի 10-ից 12-ը։ 

Ինչպես արդեն հայտնել էինք՝ Հայաստանի հավաքականները 5 արծաթե և 5 բրոնզե մեդալով են ավարտել ելույթները Երևանում անցկացված Սամբոյի մեծահասակների աշխարհի 2023 թվականի առաջնությունում: Մրցումային վերջին՝ երրորդ օրը, ԱԱ-ի փոխչեմպիոնի կոչմանն արժանացել են Ավետիք Պողոսյանը, Բորիս Շատվերյանը և Դավիթ Գրիգորյանը, իսկ բրոնզե մեդալակիր է դարձել Վաչիկ Վարդանյանը: