ԵՄ–ն Գազային 100 միլիոն եվրոյի հումանիտար օգնություն կտրամադրի

Եվրահանձնաժողովի ղեկավար Ուրսուլա ֆոն դեր Լեյենը հայտարարել է, որ Եվրամիությունը 25 միլիոն եվրոյով ավելացնում է Գազայի հատվածի բնակչությանը տրամադրվող մարդասիրական օգնությունը: Այս մասին հայտնում է Kommersant.ru–ն:

«Այսօր ես կարող եմ հայտարարել, որ մենք ավելացնում ենք Գազային տրամադրվելիք հումանիտար օգնությունը ևս 25 միլիոն եվրոյով: Եվրամիությունը այդպիսով ընդհանուր առմամբ 100 միլիոն եվրո կծախսի Գազայի խաղաղ բնակչությանը տրվելիք մարդասիրական օգնության վրա», - հանդիպման ժամանակ ասել է Ուրսուլա ֆոն դեր Լեյենը: 

Նա նաև հավելել է, որ ԵՄ-ն շարունակում է աշխատել Իսրայելի, Եգիպտոսի և ՄԱԿ-ի հետ՝ «որ ավելի շատ շարասյուններ թույլատրվեն դեպի Գազա, ներառյալ միջանցքներն ու դադարները մարդասիրական կարիքների համար»: Հոկտեմբերի 15-ին ԵՄ-ն ավելացրել է Գազայի հատվածին տրամադրվող օգնությունը՝ 50 միլիոն եվրոյից հասցնելով 75 միլիոն եվրոյի։ 

Եվրոպական դիվանագիտության ղեկավար Ժոզեպ Բորելի խոսքով՝ Իսրայելի և ՀԱՄԱՍ-ի միջև պատերազմը «կոլեկտիվ քաղաքական և բարոյական ձախողման» արդյունք է։