Թուրքիայի ԱԳ նախարարը հայտնել է Ուկրաինա այցի գլխավոր նպատակը

Թուրքիայի արտաքին գործերի նախարար Հաքան Ֆիդանն Ուկրաինա կատարած այցելության հիմնական նպատակն է համարել պատերազմի դադարեցման հնարավոր տարբերակների որոնումը։

Ինչպես հաղորդում են թուրքական լրատվամիջոցները, արտգործնախարարը նշել է, որ պաշտոնական Անկարան հակամարտության հենց սկզբից ուշադրությունը կենտրոնացրել է դիվանագիտական կարգավորման վրա։ Նա մտադիր է ուկրաինական կողմի հետ քննարկել խաղաղության հաստատմանն ուղղված հնարավոր քայլերը, ինչպես նաև ներկայացնել ստեղծված իրավիճակի վերաբերյալ սեփական գնահատականները։

Ֆիդանը նաև մատնանշել է, որ Թուրքիան նախկինում Ստամբուլում նախաձեռնել էր ռուս-ուկրաինական բանակցությունների անցկացումը, աջակցել հացահատիկի համաձայնագրի իրագործմանը, գերիների փոխանակման գործընթացին և Սև ծովում նավագնացության անվտանգության ապահովմանը։ Նախարարը հավելել է, որ նախքան Կիև ժամանելը այցելել է Մոսկվա և Փարիզ, որտեղ ուկրաինական հիմնախնդիրը եղել է քննարկումների առանցքային թեմաներից մեկը։