ԱՄՆ-ը նոր ռազմական հարվածներ է սկսել Իրանի դեմ

Միացյալ Նահանգները նոր հարվածներ է նախաձեռնել Իրանի դեմ, ինչի մասին տեղեկացնում է ԱՄՆ կենտրոնական հրամանատարությունը X-ի իր պաշտոնական էջում։

«Հարվածները նախատեսված են հետագայում նվազեցնելու այն ռազմական կարողությունները, որոնք իրանական ուժերն օգտագործել են Հորմուզի նեղուցում առևտրային նավագնացության վրա հարձակվելու համար»,- նշվում է հաղորդագրության մեջ։

Հիշեցնենք` հուլիսի 8-ի գիշերն ԱՄՆ-ն վերսկսել է Իրանի դեմ լայնածավալ հարվածները՝ մեղադրելով նրան ձեռք բերված համաձայնությունների պայմանների խախտման համար՝ կապված Հորմուզի նեղուցին վերաբերող կետի հետ։ Իրանի արտաքին գործերի նախարարության ներկայացուցիչ Էսմայիլ Բաղային հուլիսի 13-ին հայտարարել է, որ Թեհրանը երբեք չի խախտել ԱՄՆ-ի հետ ստորագրված հուշագիրը, իսկ դրա չկատարման ամբողջ պատասխանատվությունը կրում է Վաշինգտոնը:

Կողմերի միջև ինտենսիվ հարվածներ են ընթանում արդեն չորս օր շարունակ։ ԱՄՆ-ն թիրախավորում է Իրանում տարբեր օբյեկտներ, Թեհրանն էլ հարվածներ է հասցնում տարածաշրջանի երկրներում ամերիկյան թիրախների։