Թրամփը կոչ է արել Իսրայելին դուրս բերել զորքերը Լիբանանից և Սիրիայի մի հատվածից

ԱՄՆ նախագահ Դոնալդ Թրամփը հայտարարել է, որ Իսրայելի զորքերի դուրսբերումը Հարավային Լիբանանից և Հարավային Սիրիայի որոշ շրջաններից կարող է նպաստել տարածաշրջանում իրավիճակի կայունացմանը։ Այս մասին նա ասել է Fox News-ին տված հարցազրույցում։

«Կարծում եմ՝ լավ կլինի դուրս գալ Հարավային Լիբանանից և Հարավային Սիրիայի որոշ շրջաններից։ Այդ դեպքում, գուցե, իրավիճակը մի փոքր հանդարտվի։ Որովհետև մենք պետք է մեր էներգիան կենտրոնացնենք ավելի կարևոր հարցի՝ Իրանի վրա»,- նշել է Թրամփը։

ԱՄՆ նախագահը նաև հայտարարել է, որ Սիրիայի ժամանակավոր նախագահ Ահմեդ ալ-Շարաան ցանկանում է գործողություն իրականացնել «Հըզբոլլահի» դեմ:

«Ահմեդ ալ-Շարաան կցանկանար գործողություն իրականացնել «Հըզբոլլահի» դեմ, և նա դա այլ կերպ կանի։ Նա շենքեր չէր քանդի։ Ես ատում եմ, երբ շենքեր են ոչնչացվում։ Կարծում եմ՝ նա դա ավելի ճշգրիտ կանի»,- ասել է Թրամփը։