Զինծառայողների նկարները մաքրվել են, իսկ անմխիթար անցումները՝ ոչ. Ի՞նչ է կատարվում Երևանի գետնանցումներում

Երևանի գետնանցումներից մեկում քաղաքապետարանը մաքրել էր զինծառայողների պատկերները, այս մասին տեղեկացրել էր Ազատությունը:

Պարզելու համար՝ ինչու է մաքրվել հենց հերոսների պատկերները և արդյոք նախատեսվում են նման աշխատանքներ նաև մյուս գետնանցումներում, դիմեցինք Երևանի քաղաքապետարան։

Երևանի քաղաքապետի մամուլի խոսնակ Արտյոմ Կարապետյանը մեզ փոխանցեց, որ աշխատանքներն իրականացվել են բարեկարգման ծրագրի շրջանակում։ Միաժամանակ նպատակ է եղել պաշտպանել հերոսների պատկերները հնարավոր վանդալիզմից և պղծումից։

Բոլորիս հայտնի է, որ որոշ դեպքերում մարդիկ նաև հակասանիտարական վիճակ են ստեղծում գետանցումներում։ 

Բայց կա նաև այլ հարց, մաքրման աշխատանքների շրջանակում չեն ներառվել մյուս գետնանցումները, օրինակ՝ Գարեգին Նժդեհի հրապարակի գետնանցումը, կամ էլ Կենդանաբանական այգուն կից գետնանցումը:

Քաղաքապետարանից հայտնել են, որ այս փուլում աշխատանքներն իրականացվում են միայն Կենտրոն վարչական շրջանում գտնվող գետնանցումներում։ 

Մյուս վարչական շրջանների համար դեռ հստակ ժամանակացույց չկա, սակայն վստահեցրել են, որ հետագայում աշխատանքները կշարունակվեն նաև այնտեղ։