Իրանի ափերի մոտ խորտակվել է թուրքական բեռնատար նավ

Թուրքական Lora Shipping ընկերությանը պատկանող LUNI բեռնատար նավը, որը նավարկում էր Սենթ Քիթս և Նևիսի դրոշի ներքո, խորտակվել է Իրանի Բենդեր Աբբաս նավահանգստի մերձակայքում։ Այդ մասին հայտնում է Fars News-ը։

Նախնական տեղեկություններով՝ նավի կորպուսի մեջ ջուր է սկսել լցվել, ինչից հետո այն կիսվել է երկու մասի և մասամբ անցել ջրի տակ։

Դեպքի հանգամանքները դեռևս պարզված չեն։ Որոշ աղբյուրներ ենթադրում են, որ նավը բախվել է մեկ այլ նավի, մինչդեռ այլ վարկածի համաձայն՝ այն պայթել է ծովում լողացող ականի վրա։

Իրանի պաշտոնական իշխանությունները դեռ չեն հայտնել միջադեպի պատճառների, ինչպես նաև անձնակազմի շրջանում տուժածների կամ զոհերի վերաբերյալ տեղեկություններ։