Հունգարիայի նախկին արտգործնախարարը լքել է խորհրդարանը և աշխատանքի անցել BYD-ում

Հունգարիայի նախկին արտգործնախարար Պետեր Սիյարտոն վայր է դրել խորհրդարանի պատգամավորի մանդատը և աշխատանքի անցել չինական էլեկտրամոբիլներ արտադրող BYD ընկերությունում։ Այս մասին նա հայտնել է ֆեյսբուքյան իր էջում։

Սիյարտոյի խոսքով՝ ընդունել է «համաշխարհային տնտեսության առաջատար ընկերություններից մեկում միջազգային բարձր պաշտոն զբաղեցնելու հեղինակավոր առաջարկը»։

Նա նշել է, որ BYD-ում զբաղեցնելու է արտաքին կապերի և բիզնեսի նոր ուղղությունների զարգացման գծով ղեկավարի պաշտոնը։

Սիյարտոն հիշեցրել է, որ BYD-ն իր առաջին եվրոպական գործարանը կառուցել է Հունգարիայի Սեգեդ քաղաքում, և ինքը, որպես արտգործնախարար, ակտիվորեն աջակցել է այդ նախագծին։

Պետեր Սիյարտոն շուրջ 12 տարի զբաղեցրել է Հունգարիայի արտգործնախարարի պաշտոնը։ Այս տարվա խորհրդարանական ընտրություններից հետո, երբ Վիկտոր Օրբանի գլխավորած «Ֆիդես» կուսակցությունը պարտություն կրեց, նա հեռացավ պաշտոնից և այժմ սկսել է աշխատանքը BYD-ում։