ՀԱՄԱՍ-ը փախստականների անվան տակ փորձել է վիրավոր զինյալներին տեղափոխել Եգիպտոս. NYT
ՀԱՄԱՍ-ը փախստականների անվան տակ փորձել է մաքսանենգ ճանապարհով վիրավոր զինյալներին տեղափոխել Եգիպտոս: Այս մասին հայտնում է The New York Times–ը՝ հղում անելով ԱՄՆ նախագահ Ջո Բայդենի վարչակազմի ներկայացուցչին:
Նշվում է, որ Գազայի հատվածի Եգիպտոսի հետ սահմանին գտնվող Ռաֆա անցակետը բացելու ջանքերը կարճ ժամանակով կաթվածահար եղան ՀԱՄԱՍ-ի` վիրավոր գրոհայիններին անկլավից հեռացնելու փորձերի պատճառով:
Ինչպես նշում է հրատարակությունը, Մերձավոր Արևելքում հակամարտության սրման գրեթե սկզբից ամերիկյան պաշտոնյաները, որոնք մասնակցում էին անցակետի բացմանը, հայտարարեցին, որ ՀԱՄԱՍ-ը խոչընդոտում է անցակետի բացման ջանքերը՝ առաջ քաշելով «անհիմն պահանջներ»։
Այժմ The New York Times-ի աղբյուրը բացատրել է, որ շարժումը բազմիցս Իսրայելին, ԱՄՆ-ին և Եգիպտոսին տրամադրել է վիրավոր պաղեստինցիների ցուցակները՝ փախստականների և օտարերկրացիների հետ միասին Գազայից տարհանման համար: Այնուամենայնիվ, աուդիտը ցույց է տվել, որ ՀԱՄԱՍ-ի ցուցակում հայտնված մարդկանցից շատերը զինյալներ են եղել: Մասնավորապես, առաջին ցուցակում վիրավոր պաղեստինցիների մոտ մեկ երրորդը ՀԱՄԱՍ-ի ահաբեկիչներ են եղել:
Թերթի զրուցակիցը նշել է, որ ՀԱՄԱՍ-ի հետ փախստականների և օտարերկրացիների տարհանման շուրջ բանակցություններ են վարվել Քաթարի ներկայացուցիչների միջոցով, որոնք երկար ժամանակ կապ են պահպանել պաղեստինյան շարժման հետ։ Եգիպտոսը, որը փորձում է խուսափել իր տարածքներ ահաբեկիչների ներհոսքից, ամենաշատը մտահոգված էր Գազայի հատվածից գրոհայինների դուրս գալու հեռանկարով։
