ԱՄՆ-ի «դժոխային պատժամիջոցների» ծրագրերը Կրեմլում վերլուծում են. Պեսկով

ՌԴ նախագահի մամուլի քարտուղար Դմիտրի Պեսկովը հայտարարել է, որ Կրեմլը հետևում և վերլուծում է ԱՄՆ-ից հնչող հայտարարությունները Ռուսաստանի դեմ նոր պատժամիջոցների վերաբերյալ։

«Կտեսնենք՝ ինչպես կզարգանան իրադարձությունները», — ասել է Կրեմլի ներկայացուցիչը՝ մեկնաբանելով ԱՄՆ նախագահ Դոնալդ Թրամփի հայտարարությունը, ըստ որի՝ Ռուսաստանի դեմ «դժոխային պատժամիջոցներ» նախատեսող օրինագծի ընդունման հավանականությունը բարձր է։

Խոսելով ռուս-ամերիկյան փոխգործակցության մասին՝ Պեսկովը նշել է, որ Միացյալ Նահանգներն այժմ զբաղված է այլ հարցերով։ Նրա խոսքով՝ Պարսից ծոցի տարածաշրջանում իրավիճակը հեռու է կայուն լինելուց և կրկին մտել է վատթարացման փուլ, ինչը չի կարող համաշխարհային մտահոգություն չառաջացնել։ Այդ պատճառով, ըստ Պեսկովի, ամերիկյան կողմն այժմ ավելի քիչ հնարավորություններ ունի զբաղվելու ուկրաինական հակամարտության կարգավորմամբ։

Հուլիսի 13-ին CNN-ը հայտնել էր, որ ԱՄՆ նախագահը պատրաստ է աջակցել սենատոր Լինդսի Գրեհեմի նախաձեռնությանը, որը նախատեսում է նոր սահմանափակող միջոցներ կիրառել Ռուսաստանի նկատմամբ։

Սենատում հանրապետական մեծամասնության առաջնորդ Ջոն Թյունը հայտարարել է, որ Սպիտակ տունը սերտորեն համագործակցում է օրենսդիրների հետ այս հարցում և հույս ունի շուտով արդյունքի հասնել։

Գրեհեմի առաջարկած օրինագիծը նախատեսում է մինչև 500 տոկոս մաքսատուրքեր սահմանել Ռուսաստանի առևտրային գործընկերների նկատմամբ։ Միևնույն ժամանակ, օրինագծի ընդունումը չի նշանակում պատժամիջոցների ավտոմատ կիրառում․ այն ԱՄՆ նախագահին հնարավորություն է տալիս սեփական հայեցողությամբ որոշել՝ սահմանել սահմանափակումներ, թե ոչ։