ԱՄՆ-ն կենտրոնացած է Պարսից ծոցի վրա, ոչ թե Ուկրաինայի հակամարտության կարգավորման գործընթացի. Պեսկով

Կրեմլի խոսնակ Դմիտրի Պեսկովը հայտարարել է, որ ներկայում ԱՄՆ-ն կենտրոնացած է Պարսից ծոցում սրվող իրավիճակի վրա, ոչ թե Ուկրաինայի հակամարտության կարգավորման գործընթացի։ Այս մասին նա ասել է՝ պատասխանելով Վաշինգտոնի միջնորդական դերի վերաբերյալ հարցին։

«Մեր մեծ ափսոսանքով՝ Պարսից ծոցում իրավիճակը մտել է լուրջ սրման փուլ, ինչը չի կարող չառաջացնել համաշխարհային մտահոգություն», — նշել է Պեսկովը։

Նրա խոսքով՝ տարածաշրջանում զարգացող իրադարձությունների պատճառով ԱՄՆ-ն այժմ ավելի քիչ հնարավորություններ ունի զբաղվելու ուկրաինական կարգավորմամբ։

Հիշեցնենք, որ Իրանի շուրջ իրավիճակը կտրուկ սրվել է՝ վերածվելով ուղղակի ռազմական բախումների։ Հունիսին ստորագրված հուշագրի խախտման վերաբերյալ փոխադարձ մեղադրանքներից հետո ԱՄՆ-ն զանգվածային հարվածներ է հասցրել իրանական օբյեկտներին, իսկ Թեհրանը պատասխանել է Բահրեյնում, Քուվեյթում և Հորդանանում տեղակայված ամերիկյան ռազմաբազաների վրա հարձակումներով՝ միաժամանակ վերականգնելով Հորմուզի նեղուցի շրջափակումը։

Այս ֆոնին ԱՄՆ նախագահ Դոնալդ Թրամփը սպառնացել է ընդլայնել հարվածների թիրախները՝ դրանցում ներառելով նաև Իրանի էլեկտրակայաններն ու կամուրջները, եթե Թեհրանը չհամաձայնի բանակցությունների։ Իր հերթին Իսրայելի վարչապետ Բենիամին Նեթանյահուն զգուշացրել է, որ Իրանի գործողություններին ի պատասխան կարող է լինել «նախորդներից շատ ավելի լուրջ» արձագանք։