Սաուդյան Արաբիան կընդունի Ֆուտբոլի աշխարհի 2034-ի առաջնությունը

Սաուդյան Արաբիան կընդունի Ֆուտբոլի աշխարհի 2034 թվականի առաջնությունը։ Այս մասին հայտնում է BBC-ի ռուսական ծառայությունը։

Ավստրալիայի ֆուտբոլի ասոցիացիան որոշել է, որ Աշխարհի առաջնության փոխարեն մտադիր է կենտրոնանալ 2026 թվականին կանանց Ասիայի գավաթը և 2029 թվականին ՖԻՖԱ-ի աշխարհի ակումբային առաջնությունն ընդունելու իր ծրագրերի վրա։ 

Ֆուտբոլի աշխարհի 2026 թվականի առաջնությունը տեղի կունենա ԱՄՆ-ում, Մեքսիկայում և Կանադայում։  Մարոկկոն, Պորտուգալիան և Իսպանիան կհյուրընկալեն 2030 թվականի աշխարհի առաջնությունը, որոշ հանդիպումներ կկայանան Արգենտինայում, Պարագվայում և Ուրուգվայում: 

ՖԻՖԱ-ն ավելի վաղ հայտարարել էր, որ 2034 թվականի աշխարհի առաջնությունը կարող է կայանալ կամ Ասիայում կամ Օվկիանիայում:  Ուստի Ավստրալիան համարվում էր Սաուդյան Արաբիայի միակ մրցակիցը: 

Չնայած Սաուդյան Արաբիայի հայտին աջակցում է Ասիական ֆուտբոլի կոնֆեդերացիան, սակայն Աշխարհի առաջնությունն այնտեղ անցկացնելու որոշումը հակասական կլինի: 

Այս երկիրը բազմիցս մեղադրվել է մարդու իրավունքների խախտման մեջ։  Այն 2022 թվականին միայն մեկ օրում մահապատժի է ենթարկել 81 մարդու, և Էր Ռիադը նաև քննադատության է ենթարկվել կանանց իրավունքները ճնշելու, համասեռամոլության քրեականացման, խոսքի ազատության սահմանափակումների և Եմենի պատերազմին մասնակցելու համար: