Իսրայելական բանակը հայտարարել է ՀԱՄԱՍ-ի ավելի քան 600 օբյեկտների վրա հարվածներ հասցնելու մասին

Իսրայելի պաշտպանության բանակը (IDF) Telegram-ի ալիքում հայտնել է, որ վերջին մի քանի օրվա ընթացքում հարվածներ է հասցրել պաղեստինյան ՀԱՄԱՍ շարժման ավելի քան 600 թիրախների։

«Վերջին մի քանի օրերի ընթացքում Իսրայելի պաշտպանության բանակը խոցել է ահաբեկիչների ավելի քան 600 թիրախ, այդ թվում՝ զենքի պահեստներ, տասնյակ հակատանկային հրթիռների արձակման վայրեր, ինչպես նաև թաքստոցներ և օպերատիվ բազաներ, որոնք օգտագործվում են ՀԱՄԱՍ-ի կողմից», - ասվում է բանակի հայտարարության մեջ։ 

Բանակի տվյալներով՝ Իսրայելի պաշտպանության բանակը ավիահարված է հասցրել ՀԱՄԱՍ-ի անձնակազմի կենտրոնացմանը Գազայում գտնվող շենքում, որտեղ ավելի քան 20 գրոհային է եղել։

Բացի այդ, Իսրայելի պաշտպանության ուժերը հայտարարել են Գազայում «տասնյակ ահաբեկիչների» ոչնչացման մասին, որոնք բարիկադավորվել են շենքերում և թունելներում և փորձել են հարձակվել իսրայելական ուժերի վրա։