Ինչ ազդեցություն է ունեցել Սոթքի հանքավայրի աշխատանքի դադարեցումը ՀՀ տնտեսության վրա

Սոթքի ոսկու հանքավայրի աշխատանքի դադարեցումը 2023թ–ին բացասաբար է ազդել ՀՀ տնտեսության աճի ցուցանիշների վրա։ Այս մասին ԱԺ–ի մշտական հանձնաժողովների համատեղ նիստում հայտարարել է ՀՀ ֆինանսների նախարար Վահե Հովհաննիսյանը` ամփոփելով 2023թ–ի հիմնական տնտեսական ցուցանիշները։

Ավելի վաղ՝ մայիսին տեղեկացրել էինք, որ պարբերական հրետակոծությունների պատճառով Սոթքի բաց հանքի աշխատանքը դադարեցվել է։ Հոկտեմբերին Գեղարքունիքի մարզպետ Կարեն Սարգսյանը հայտարարեց, որ հանքավայրը մասամբ շարունակում է աշխատել, խոսքը փակ հատվածի մասին է։ 

Նախարար Վահե Հովհաննիսյանի խոսքով` արդյունաբերությունը բացասաբար է ազդել տնտեսական ակտիվության ցուցանիշի վրա, և այստեղ մեծ ազդեցություն է ունեցել հատկապես Սոթի հանքի փակումը։

Իսկ հիմնական տնտեսական աճն ապահովվել է ծառայությունների աճով։ Արդյունքում 2023թ–ի հունվար–սեպտեմբերին տնտեսական ակտիվությունը կազմել է 9.7 տոկոս, թեև օգոստոսին գրանցված բարձր աճը սեպտեմբերին դանդաղել է նաև ծառայությունների ոլորտում։

ՀՀ–ից արտահանումը 2023թ–ին աճել է 48 տոկոսով, ինչը, ըստ նրա, պայմանավորված է հիմնականում դեպի ՌԴ վերաարտահանման ծավալների 3–ակի աճով, մինչդեռ հայկական արտադրության ապրանքները արտահանման մեջ նվազել են 0.8 տոկոսով։