Գուտերեշը հերքել է մեղադրանքները, թե ինքն իբր արդարացնում է ՀԱՄԱՍ-ի հարձակումն Իսրայելի վրա

ՄԱԿ-ի գլխավոր քարտուղար Անտոնիո Գուտերեշը հերքել է այն մեղադրանքները, թե ինքն իբր արդարացնում է ՀԱՄԱՍ-ի հարձակումն Իսրայելի վրա։ Նրա խոսքերը մեջբերում է Reuters-ը։

Գլխավոր քարտուղարը նշել է, որ ցնցված է իր որոշ հայտարարությունների խեղաթյուրումներից։ «Դա սուտ է։ Ամեն ինչ այլ է եղել»,- ասել է նա՝ նկատի ունենալով այն մեղադրանքը, թե ինքն արդարացնում է ՀԱՄԱՍ-ի հարձակումները։

Նա հավելել է, որ ցանկանում է ճշգրտում մտցնել, առաջին հերթին հարձակման ժամանակ զոհվածների հանդեպ հարգանքից ելնելով:

Ավելի վաղ Գուտերեշը հայտարարել էր, որ ՀԱՄԱՍ-ի հարձակումն Իսրայելի վրա տեղի չի ունեցել առանց պատճառի, պաղեստինցի ժողովուրդը 56 տարի օկուպացիայի է ենթարկվում։ Այնուհետև ՄԱԿ-ում Իսրայելի դեսպան Գիլադ Էրդանը կազմակերպության ղեկավար Անտոնիո Գուտերեշին կոչ է արել անհապաղ հրաժարական տալ։