Դիտարկել Ուկրաինայի և Մոլդովայի միջև գործող կարգավորումը․ Սաակաշվիլին դիմել է Երևանին և Բաքվին
Վրաստանի նախկին նախագահ, Օդեսայի նախկին նահանգապետ Միխեիլ Սաակաշվիլին ֆեյսբուքյան իր էջում գրառում է արել՝ դիմելով Հայաստանի և Ադրբեջանի ղեկավարությանն ու զգուշացրել «միջանցքի» հարցով Հարավային Կովկասում ռազմական նոր հակամարտության սպառնալիքի մասին և ընդգծել, որ կան այլընտրանքային լուծումներ:
Պնդելով, որ «Ռուսաստանը շահագրգռված է այդ հակամարտությունը բորբոքելով», քանի որ «նման պատերազմը ոչ միայն կվնասի Ադրբեջանի միջազգային վարկը, այլև կարող է հանգեցնել Հայաստանում կառավարության փոփոխության», Սաակաշվիլին Ադրբեջանի և Հայաստանի ղեկավարներին հորդորում է որպես հնարավոր օրինակ դիտարկել Ուկրաինայի և Մոլդովայի միջև գոյություն ունեցող կարգավորումը:
«Այս երկու երկրները պահպանում են բարիդրացիական հարաբերություններ՝ փոխադարձաբար ճանաչելով միմյանց սահմանները: Սցենարում, որտեղ Ուկրաինան խնդրում էր Օդեսա քաղաքից մուտք դեպի Օդեսայի շրջանի հարավային մաս, Մոլդովան պատրաստակամորեն համաձայնեց վարձակալությամբ տալ Դնեստրի շրջանով անցնող մի ճանապարհ: Որպես Օդեսայի նախկին նահանգապետ՝ ես հաճախ եմ օգտվել այդ վարձակալված ճանապարհից (որը վերանորոգել եմ) ուկրաինացի սահմանապահների հսկողության տակ, երբ ցանկացել եմ ճամփորդել ուկրաինական Բեսարաբիա: Մոլդովան կոմերցիոն օգուտներ է ստանում այս համաձայնությունից», - գրում է Վրաստանի նախկին նախագահն իր ֆեյսբուքում:
Նա նաև հավելել է․ «Ադրբեջանի և Հայաստանի միջև իրավիճակի համանման լուծում կիրառելը շահավետ կլինի երկու երկրների համար։ Հայաստանը կարող է առևտրային և ֆինանսական օգուտ ստանալ, ինչպես նաև օգտվել զգալի տարանցիկ ճանապարհներից: Բացի այդ, Ադրբեջանը կարող էր խուսափել ռուսական զորքերի շարունակական ներկայության անհրաժեշտությունից, ինչը, ի վերջո, կբերի երկու երկրների միջև խաղաղ գոյակցության»։
