ՀՀ–ն ցանկանում է խորացնել Եվրամիության հետ հարաբերությունները. Փաշինյան

Հայաստանը ցանկանում է խորացնել Եվրամիության հետ հարաբերությունները։ Այսօր Ստրասբուրգում Եվրախորհրդարանի ղեկավար Ռոբերտա Մեցոլայի հետ համատեղ ասուլիսում այս հայտարարությունն արեց ՀՀ վարչապետ Նիկոլ Փաշինյանը։ Նա շեշտեց` մեր երկիրը չի ցանկանում դա որևէ կերպ հակադրել տարածաշրջանային հարաբերությունների խորացման, զարգացման տեսլականին։

«Եվրամիություն–Հայաստան հարաբերությունները հենվում են ընդհանուր արժեհամակարգի վրա, և ժողովրդավարությունը ՀՀ–ի համար ռազմավարական ընտրություն է, ոչ թե հանգամանքներով պայմանավորված պատեհություն»,– ասաց ՀՀ վարչապետը։

Նա հավելեց, որ Հայաստանը հանձնառու է ՀՀ–ԵՄ համապարփակ և ընդլայնված գործընկերության համաձայնագրի լիակատար իրականացմանը։

Վարչապետը շեշտեց, որ Եվրամիության հետ հարաբերություններում ավելացել է նաև անվտանգային բաղադրիչ` ի դեմս քաղաքացիական առաքելության, որը մշտադիտարկում է իրականացնում Ադրբեջանի հետ ՀՀ պետական սահմանի երկայնքով։

«Եվրոպական քաղաքական համայնքի Գրանադայի գագաթնաժողովի, այսօրվա քննարկումների և Ձեր (խմբ. Եվրախորհրդարանի ղեկավար) հայտարարության արդյունքում ակնհայտ է, որ ԵՄ ինստիտուտների շրջանում ՀՀ–ի հետ հարաբերությունները խորացնելու վերաբերյալ առկա է կոնսենսուս։ Հայաստանը նաև շահագրգռված է միջազգային իրավակարգի խթանման և զարգացման հարցում»,– նշեց Փաշինյանը։

Նա հիշեցրեց, որ հոկտեմբերի 3-ին ՀՀ ԱԺ–ն վավերացրեց Հռոմի ստատուտը։ Մինչ այդ` սեպտեմբերին, Հայաստանի խորհրդարանը որոշում էր կայացրել վավերացնելու Մարդու իրավունքների հիմնարար ազատությունների մասին կոնվենցիային կից «Բոլոր դեպքերում մահապատժի վերացման մասին» թիվ 13 արձանագրությունը։

Վարչապետը շեշտեց` Հայաստանն այսօր մի շարք մարտահրավերների հարցում ակնկալում է Եվրամիության աջակցությունը։ Այս շարքում առաջնահերթ է Լեռնային Ղարաբաղից ավելի քան 100 հազար հայերի բռնի տեղահանման հետևանքով ստեղծված հումանիտար ճգնաժամի հաղթահարումը։ Փաշինյանի խոսքով` այստեղ Հայաստանը հրատապ աջակցության կարիք ունի։