ԿԽՄԿ Գազայի հիվանդանոցներն առանց էլեկտրականության դիահերձարանների վերածվելու վտանգի տակ են: Այս մասին հայտնում է Կարմիր խաչի միջազգային կոմիտեն: 

Գազայի միակ էլեկտրակայանը չորեքշաբթի օրը սպառել է վառելիքը, իսկ պահեստային գեներատորները կարող են ժամերի ընթացքում դադարել աշխատել: 

Նշենք, որ Գազայի հատվածում բժշկական կենտրոնները ծանրաբեռնված են այն բանից հետո, երբ Իսրայելը «լայնածավալ հարված» է հասցրել ՀԱՄԱՍ-ին պատկանող օբյեկտներին: Իսրայելը խոստացել է չվերականգնել էլեկտրաէներգիան և թույլ չտալ մարդասիրական օգնություն Գազայի հատվածում, քանի դեռ ՀԱՄԱՍ-ը չի ազատել շուրջ 150 պատանդներին, որոնց առևանգել էր շաբաթ օրը զինված հարձակումների ժամանակ: 

«Քանի որ Գազայի հատվածը հոսանքազրկվում է, հիվանդանոցները կորցնում են էլեկտրաէներգիան՝ վտանգի տակ դնելով նորածիններին ինկուբատորներում, իսկ տարեց հիվանդներին թողնելով առանց թթվածնի: Առանց ռենտգենյան ճառագայթների` վտանգի տակ է նաև երիկամների դիալիզ ունեցող մարդկանց կյանքը», - ասել է ԿԽՄԿ-ի տարածաշրջանի տնօրեն Ֆաբրիցիո Կարբոնին: 

Նա հավելել է, որ հիվանդանոցները դեռ աշխատում են գեներատորներով, բայց վառելիքը կբավարարի միայն մի քանի ժամ:

Գազայի հատվածում իսրայելական հարվածների հետևանքով զոհերի թիվը հասել է 1417-ի, տուժել է ավելի քան 6,200 մարդ, հայտնել են Պաղեստինի առողջապահության նախարարությունից: Իսրայելում, վերջին տվյալներով, հակամարտության հետևանքով զոհվել է 1,300 մարդ: Մոտ 3,300 մարդ տուժել է։ 

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։