Եգիպտոսի ԱԳՆ-ն Իսրայելին կոչ է արել դադարեցնել հարձակումները Ռաֆահ անցակետի պաղեստինյան կողմի վրա

Եգիպտոսի արտաքին գործերի նախարարությունը կոչ է արել Իսրայելին դադարեցնել հարձակումները Գազայի հատվածի և Եգիպտոսի միջև գտնվող Ռաֆահ անցակետի պաղեստինյան կողմի վրա, որպեսզի այն վերաբացվի, հաղորդում է իսրայելական 12 հեռուստաալիքը:

Անցակետը փակվել է այն բանից հետո, երբ երեքշաբթի կեսօրից հետո Իսրայելը հարվածել է այդ անցակետին եւ ամբողջովին շրջափակել Գազայի հատվածը՝ թույլ չտալով, որ սնունդ կամ վառելիք մտնի Գազա:

Եգիպտոսն ասում է, որ չի փակել անցակետի իր մասը և կոչ է անում տարածաշրջանի բոլոր երկրներին և միջազգային կազմակերպություններին մարդասիրական օգնություն տրամադրել Գազայի բնակիչներին Սինայի հյուսիսում գտնվող Էլ Արիշ օդանավակայանով, որը գտնվում է Ռաֆահ անցակետից մոտ 56 կմ հեռավորության վրա:

Հորդանանը մարդասիրական օգնության խմբաքանակ է ուղարկել Եգիպտոս, որը նախատեսված է Գազայի հատվածի համար, գրում է New York Times-ը, սակայն պարզ չէ, թե արդյոք թույլ կտան օգնություն հասցնել ափամերձ գոտի։