ՏԵՍԱՆՅՈՒԹ. Օդեսայի մարզում պայթյուններ են որոտացել. հրդեհվել է 9 բեռնատար

Ուկրաինայի Օդեսայի մարզի Իզմայիլ շրջանի սահմանային և նավահանգստային ենթակառուցվածքում պայթյուններ են տեղի ունեցել, Telegram ալիքում հայտնել է շրջանային ռազմական վարչակազմի ղեկավար Օլեգ Կիպերը։

Նա նշել է, որ պայթյունների հետեւանքով վնասվել են ենթակառուցվածքները, հրդեհվել է 9 բեռնատար։

«Հրդեհը մարվել է… Լաստանավային ծառայությունը ժամանակավորապես դադարեցվել է»,- գրել է Կիպերը։

Նրա խոսքով՝ տարածաշրջանում ավիահարվածի մասին ահազանգը տևել է ավելի քան երեք ժամ։

Ռուսաստանի զինված ուժերը սկսել են հարվածներ հասցնել Ուկրաինայի ենթակառուցվածքին հոկտեմբերի 10-ին՝ Ղրիմի կամրջի վրա տեղի ունեցած ահաբեկչությունից երկու օր անց, որի թիկունքում,  ըստ ռուսական իշխանությունների, կանգնած էին ուկրաինական հատուկ ծառայությունները։ Ամբողջ երկրում հարվածներ են հասցվում էներգետիկայի, պաշտպանական արդյունաբերության, ռազմական հրամանատարության և կապի օբյեկտներին։ Այդ ժամանակից ի վեր ամեն օր օդային հարձակումների մասին ահազանգեր են հայտարարվում Ուկրաինայի շրջաններում, երբեմն՝ ողջ երկրում: