Արցախցիներն աջակցության ծրագրերով կարող են և՛ տուն գտնել, և՛ կարիքները հոգալ. Քերոբյան

Արցախից բռնի տեղահանվածները ՀՀ կառավարության տրամադրած աջակցության և ֆինանսական ծրագրերով կարող են և՛ տուն վարձել, և՛ առաջնային կարիքները հոգալ։ Կառավարության նիստից հետո պատասխանելով լրագրողների հարցերին` այս հայտարարությունն արեց ՀՀ էկոնոմիկայի նախարար Վահան Քերոբյանը։

Քերոբյանի տվյալներով` ՀՀ–ում այսօր առկա է մոտավորապես 50 հազար դատարկ բնակարան և տուն, ըստ այդմ` արցախցիները կարող են բավականին համար գներով ու պայմաններով տուն գտնել ՀՀ տարածքում։ Նա օրինակ բերեց իր ընկերներից մեկին, որի ընտանիքն 8 անդամից բաղկացած և 200 հազար դրամով սեփական տուն է վարձել Փարաքարում։

Քերոբյանը նաև նշեց, որ Սյունիքի մարզի Կոռնիձոր գյուղում մասնակցել են բռնի տեղահանվածների առաջնային սնունդով ապահովելու գործընթացին և 3-4 օրվա ընթացքում մոտավորապես 75 հազար սննդի փաթեթ են տրամադրել արցախցիներին։

Լրագրողները ՀՀ էկոնոմիկայի նախարարին հարց ուղղեցին նաև Արցախի հանձնման մասին։

«Արցախի ղեկավարությունը ուներ ուրիշ անուն այն պահին, երբ ստորագրվեց ԼՂ պետական մարմինների… գիտեք, չէ՞, ով է ստորագրել, ինչի համար եք ասում, որ Նիկոլ Փաշինյան…Ուրիշ հարց տվեք ինձ…Ինձ տնտեսական հարց տվեք»,– արձագանքեց Քերոբյանը։

Հիշեցնենք` Լեռնային Ղարաբաղից տեղահանվածներին ՀՀ բյուջեից կհատկացվի միանվագ 100-հազարական դրամ։ Բացի այդ, յուրաքանչյուր ընտանիքի բնակության ծախսերը հոգալու համար մեկ անձի հաշվով կտրամադրվի ամսական 40 հազար դրամ։