ԱԱԾ-ն բացահայտել և կանխել է իշխանությունը յուրացնելու դեպք. ձերբակալվել են Ալբերտ Բազեյանն ու ևս 7 հոգի
«Խաչակիրներ ռազամահայրենասիրական» ՀԿ 8 անդամ, այդ թվում՝ Ալբերտ Բազեյանը, ինչպես նաև այլ անձինք ձերբակալվել են։ Տեղեկությունը հայտնում է ՀՀ ազգային անվտանգության ծառայությունը։
«Ունենալով հակաիշխանական հայացքներ, ՀՀ կառավարության անդամների և ղեկավարի նկատմամբ գաղափարական թշնամանք, նախնական համաձայնության գալով միմյանց հետ` պայմանավորվածություններ են ձեռք բերել իրենց մոտ պահվող զենք-զինամթերքը որպես հանցագործության գործիք օգտագործելու միջոցով կյանքի կամ առողջության համար վտանգավոր բռնություն գործադրելու եղանակով և դրա սպառնալիքով զավթելու իշխանությունը, մասնավորապես՝ Սահմանադրությամբ չնախատեսված այլ եղանակով տիրանալ ՀՀ կառավարության լիազորություններին»,- նշված է հաղորդագրության մեջ:
Ըստ ԱԱԾ-ի՝ հանցավոր խմբի անդամները ձեռք են բերել հեռահաղորդակցության սարքեր, հեռախոսային ու այլ կապը խլացնող սարքեր, հանցանքի կատարումը հեշտացնող միջոցներ և գործիքներ։
ԱԱԾ-ից նշում են նաև, որ այդկերպ «Խաչակիրներ ռազամահայրենասիրական» ՀԿ–ի անդամները նախապատրաստվել են կատարել իշխանության յուրացում, սակայն «իրենց կամքից անկախ հանգամանքներոում չեն կարողացել սկսել իրենց դիտավորության մեջ ընդգրկված հանցանքի օբյեկտիվ կողմի կատարումը, քանի որ այն բացահայտվել և խափանվել է ՀՀ ազգային անվտանգության ծառայության աշխատակիցների կողմից»:
ՀԿ–ի ութ անդամների նկատմամբ հարուցվել են հանրային քրեական հետապնդումներ, ներկայացվել են մեղադրանքներ ՀՀ քրեական օրենսգրքի 43-419-րդ հոդվածի 1-ին մասով (հանցագործոււթյան նախապատրաստում, իշխանության յուրացում):
Բացի այդ, ԱԱԾ-ն խուզարկություններ է կատարել հանցավոր խմբի անդամների բնակության հասցեներում և հասարակական կազմակերպություն հանդիսացող աշխատավայրերում, որոնց արդյունքում հայտնաբերվել են հրազեն, զենք, ռազմամթերք, օդաճնշիչ ատրճանակներ, զրահաբաճկոններ, հեռահաղորդակցության սարքեր, համակարգիչներ, տարբեր գրառումներ պարունակող նոթատետրեր, փաստաթղթեր և այլն։
Նախաքննությունը շարունակվում է հանցավոր խմբի կազմում ներգրավված անձանց ողջ շրջանակը պարզելու, նրանց նկատմամբ քրեաիրավական ներգործության միջոցներ կիրառելու համար:
Հիշեցնենք, որ սեպտեմբերի 23-ի երեկոյան իր տնից ԱԱԾ աշխատակիցների կողմից ձերբակալվել է «Երկրապահ» պատգամավորական նախկին խմբի ղեկավար, ԵԿՄ նախկին փոխնախագահ Ալբերտ Բազեյանը։ Նրա նկատմամբ մեղադրանք է առաջադրվել իշխանության յուրացման կասկածանքով։
