ՏԵՍԱՆՅՈՒԹ. Կլինե՞ն նոր արտահերթ ընտրություններ. պարզաբանում է ԿԸՀ քարտուղարը

ԿԸՀ քարտուղար Արմեն Սմբատյանն այսօր լրագրողների հետ հանդիպմանն անդրադարձել է հարցին, թե արդյոք մասնակցության ցածր տոկոսը կարող է երկրորդ փուլի հիմք լինել:

«Մեր օրենսդրությամբ ընդհանրապես ընտրությունների քվորում չկա, և ընտրությունը համարվում է կայացած, եթե այլ խնդիրներ չկան, այսինքն` կախված մասնակիցների թվից` այն չի կարող համարվել անվավեր, առոչինչ կամ այլ ընթացակարգով չճանաչվել որպես ընտրություն կամ չկայացած ճանաչվել»,- ասել է նա:

Սմբատյանը նշել է,, թե ցածր մասնակցությունն ավելի շատ քաղաքական գործիչների և քաղաքագետների ուսումնասիրության առարկան է:

«Կարծում եմ` ավելի բարձր պիտի լինի վերաբերմունքը Երևանի նկատմամբ, անտարբերություն նկատվեց: Երկրորդ փուլ այս ընթացակարգով գոյություն չունի: Եթե Երևանի ավագանու որևէ խմբակցություն չի ունենում 33 կամ ավել մանդատ, և ավտոմատ կերպով նրա առաջին համարը քաղաքապետ չի ընտրվում, ավագանին պարտավոր է առաջին նիստից հետո երկշաբաթյա ընթացքում ընտրել Երևանի քաղաքապետ, եթե չի հաջողվում, այդ դեպքում լուծարվում է, այն է` լիազորությունների ժամկետը կրճատվում է, նշանակվում են նոր, արտահերթ ընտրություններ»,- ասել է նա` հավելելով, որ արտահերթ ընտրության մասին խոսելը դեռ վաղ է, քանի որ նախնական արդյունքները հայտնի չեն:

Հիշեցնենք՝  ժամը 20:00-ի դրությամբ՝ Երևանի ավագանու 2023թ. ընտրություններին 824 250 ընտրողներից մասնակցել է  324,553 քաղաքացի կամ 28.46 տոկոսը, հայտնում են ԿԸՀ-ից։ 
 

2018-ի ավագանու ընտրություններին նույն ժամանակահատվածում մասնակցել էր 370,323 քաղաքացի (43.65%)։

2017թ․-ին՝ 245.226 քաղաքացի (40.99%)