Հայաստանն ամբողջությամբ հրաժարվեց մահապատժի գործընթացից

Ազգային ժողովն ընդունեց «Մարդու իրավունքների եւ հիմնարար ազատությունների պաշտպանության մասին» կոնվենցիային կից՝ «Բոլոր դեպքերում մահապատժի վերացման մասին» թիվ 13 արձանագրությունը։ Օրենքն ուժի մեջ կմտնի պաշտոնական հրապարակմանը հաջորդող օրվանից:

«Մարդու իրավունքների եւ հիմնարար ազատությունների պաշտպանության մասին» կոնվենցիային կից՝ «Բոլոր դեպքերում մահապատժի վերացման մասին» թիվ 13 արձանագրությունը ստորագրվել է 2002թ. մայիսի 3-ին Վիլնյուսում:

Հայաստանի Հանրապետության կողմից Արձանագրությունը ստորագրվել էր 2006թ. մայիսի 19-ին: Այս պահի դրությամբ Արձանագրությունը ստորագրել է 46 պետություն, ուժի մեջ է մտել 44 պետության համար:

Արձանագրության վավերացումը համահունչ է Հայաստանի՝ որպես մահապատիժը ամբողջական վերացման կողմնակից պետության քաղաքականությանը։ Այն ամրագրում է, որ մահապատիժը վերացվում է, և ոչ-ոք չի կարող դատապարտվել և ենթարկվել մահապատժի, իսկ արձանագրության դրույթների որևէ վերապահում կոնվենցիայի 57-րդ հոդվածի մասով թույլատրելի չէ։