Տեղի է ունեցել հայ–ամերիկյան համատեղ զորավարժությունների բացման հանդիսավոր արարողությունը

Երևանում մեկնարկել են «Արծիվ գործընկեր –2023» հայ–ամերիկյան համատեղ զորավարժությունները։ Այս մասին հայտնում է AFP–ն։

«Այսօր տեղի ունեցավ «Արծիվ գործընկեր-2023» հայ–ամերիկյան համատեղ զորավարժությունների բացման հանդիսավոր արարողությունն»,– AFP գործակալությանը հայտնել է Եվրոպայում և Աֆրիկայում ԱՄՆ բանակի ներկայացուցիչը:

Հիշեցնենք՝ ավելի վաղ հայտնել էինք, որ այսօր մեկնարկում են հայ–ամերիկյան համատեղ զորավարժությունները։

Ինչպես ավելի վաղ տեղեկացրել էին ՀՀ պաշտպանության նախարարությունից, զորավարժության նպատակն է բարձրացնել միջազգային խաղաղապահ առաքելությունների մասնակցող ստորաբաժանման փոխգործակցելիության մակարդակը խաղաղապահ գործողությունների շրջանակում, իրականացնել կառավարման և մարտավարական հաղորդակցման լավագույն փորձի փոխանակում, ինչպես նաև բարձրացնել հայկական ստորաբաժանման պատրաստվածությունը ՆԱՏՕ/ ԳՀԽ «Օպերատիվ կարողությունների հայեցակարգ»-ի պլանային գնահատման համար: