Տնտեսագետը՝ վերջին շրջանում բենզինի թանկացման մասին․ Sputnik

Հայաստանը նավթ արդյունահանող երկիր չէ, հետևաբար բենզինն այստեղ էժան լինել չի կարող։ Այս մասին Sputnik Արմենիայի հետ զրույցում ասել է տնտեսագետ Արմեն Քթոյանը։

Նա անդրադարձել է բենզինի գների` վերջին շրջանի վայրիվերումներին։ Եթե 2023 թ. սկզբին 94 տեսակի բենզինի` պրեմիումի 1 լիտրը հնարավոր էր ձեռք բերել 320–340 դրամով, ապա այն հիմա թանկացել է` հասնելով մինչև 520 դրամի։ Մինչ այս բենզինի ամենաբարձր գինը գրանցվել էր 2022 թ. ապրիլին` 1 լիտր պրեմիում դասի բենզիննարժեր 540 դրամ:

Ինչպես գրում է լրատվամիջոցը,  Արմեն Քթոյանի համոզմամբ` մի քանի ամիս արձանագրված գնանկումը հազվադեպ, մեկանգամյա երևույթ է։ Դրա համար տնտեսագետն ունի մի քանի հիմնավորում։

Նա հիշեցրել է, որ բենզինի մեր հիմնական մատակարարը Ռուսաստանն է, ավելի քիչ ծավալներով` Եգիպտոսը, Հունաստանը և Իրանը (քանի որ առկա են տրանսպորտային խնդիրներ հատկապես 2020 թ. պատերազմից հետո)։

Երբ ՀՀ-ում բենզինի գինն ընկավ, պատճառը, ըստ Քթոյանի, այն էր, որ ՌԴ-ում նավթավերամշակող ընկերությունները նախկինի պես շարունակում էին իրենց գործունեությունը, սակայն արևմտյան պատժամիջոցների հետևանքով պահանջարկը սկսեց կրճատվել, արտահանման ծավալները` նվազել։

«Այդ ընթացքում հայաստանյան մատակարարները, որոնք կարողացան ԵԱՏՄ մեր անդամակցության տված որոշակի արտոնություններով նավթավերամշակող ընկերություններից ձեռքբերել բենզին, ըստ էության, գները չբարձրացրին»,– նշել է Քթոյանը։

ՀՀ–ում բենզինի գնի բարձրացման մյուս գործոններից Քթոյանն առանձնացրել է ՌԴ կենտրոնական բանկի կողմից ռուբլու թանկացումը, ինչպես նաև լոգիստիկ խնդիրները։