Նատալյա Ռոտենբերգը Երևանի քաղաքապետի թեկնածու չէ

Երևանի ավագանու ընտրություններում «Ուժը հայրենյաց» կուսակցության ցուցակը կգլխավորի արդարադատության երրորդ դասի պետական խորհրդական Նելլի Հարությունյանը, հայտնում են կուսակցությունից։

Ըստ քաղաքական ուժի՝ Նատալյա Արզաքանցյանը, որ ավելի վաղ ընդունված որոշմամբ պետք է գլխավորեր ցուցակը և լիներ կուսակցության քաղաքապետի թեկնածուն, որոշել է, որ ցուցակը պետք է գլխավորի ազգությամբ հայ ներկայացուցիչ։

Կուսակցության ղեկավար Տիգրան Արզաքանցյանն էլ հավելյալ տեղեկացրել է, որ Երևանի քաղաքապետի թեկնածուն Նելլի Հարությունյանն է։

Նելլի Հարությունյանը տասնամյակներ շարունակ աշխատել է իրավապահ համակարգում։ Նա զբաղեցրել է մի շարք պաշտոններ, տեղեկացնում են «Ուժը հայրենյացից»։ Նա եղել է ՀՀ գլխավոր դատախազության միջազգային-իրավական կապերի բաժնի պետը, հատկապես կարևոր գործերի քննության գլխավոր վարչության ավագ քննիչ։ Մինչ օրս «Հայաէրոնավիգացիա» ընկերության գլխավոր տնօրենի իրավախորհրդատուն է։

Երևանի ավագանու ընտրությունները կկայանան սեպտեմբերի 17-ին։ Քարոզարշավը կմեկնարկի օգոստոսի 23-ին, կավարտվի սեպտեմբերի 15-ի կեսգիշերին։ Ընտրությունները կանցկացվեն համամասնական ընտրակարգով՝ կուսակցության կամ կուսակցությունների դաշինքների ընտրական ցուցակներով։

Իշխող «Քաղաքացիական պայմանագիրը» դեռ անցած մարտին է հայտարարել, որ իրենց թեկնածուն Տիգրան Ավինյանն է։ «Ապրելու երկիրի» Երևանի քաղաքապետի թեկնածուն կուսակցություն նախագահ Մանե Թանդիլյանն է։ «Լուսավոր Հայաստան» կուսակցության ցուցակը կգլխավորի Դավիթ Խաժակյանը։

Ընտրություններին առայժմ իրենց մասնակցության մասին հայտնել են նաև փաստաբան Նորայր Նորիկյանը, Կենտրոնի նախկին թաղապետ Վիկտոր Մնացականյանը և ևս մի քանի հոգի։

Խորհրդարանական ընդդիմությունը մասնակցել-չմասնակցելու վերաբերյալ դեռ որոշում չունի։