ՏԵՍԱՆՅՈՒԹ. Փաստաթուղթը ստորագրվելուց հետո, համարեք, որ արդեն Արցախը լուծարվել է Ադրբեջանի մեջ․ Օսկանյա
Թեզը, թե Բաքուն և Ստեփանակերտը երկխոսություն ունենան, և այլն, ձևականություն է։ Այս մասին տեսաուղերձում ասել է ՀՀ արտաքին գործերի նախկին նախարար Վարդան Օսկանյանը՝ անդրադառնալով Հայաստանի իշխանությունների թեզին, թե պետք է լինի Ստեփանակերտ-Բաքու երկխոսություն` Լեռնային Ղարաբաղի ժողովրդի իրավունքների և անվտանգության հարցի հասցեագրման համար։
«Այն պահին, երբ այդ երկխոսությունը սկսվի, փաստաթուղթը ստորագրվելուց հետո, համարեք, որ արդեն Արցախը լուծարվել է Ադրբեջանի մեջ։ Եվ հարցը փակված է»,- նշել է ԱԳ նախկին նախարարը։
«Այն, ինչ Փաշինյանն անում է, իրեն թվում է, թե այս իրավիճակում հարցի լուծման ամենահեշտ ճանապարհն է»,- ասել է Օսկանյանը՝ խոսելով Հայաստանի և Ադրբեջանի միջև հարաբերությունների կարգավորման բանակցություններում քայլերի մասին։
Ըստ նրա՝ այն, ինչ Փաշինյանն անում է, անիրատեսական է․ «Ինքը ուզում է մի բան, որն իրենը չէ, որ տա։ Նա ուզում է մի տարածք, որ հազարամյակներ պատկանել է Արցախի ժողովրդին Այնտեղ հայեր են ապրել։ Ինքն ուզում է տալ մի տարածք, որը երբեք, երբեք անկախ Ադրբեջանի կազմում չի եղել»։
Օսկանյանը նշել է, որ աշխարհում 50-ից ավելի ինքնորոշման շարժումներ կան, որոնք գործընթացներ են, շարունակվում են, մի մասը՝ 80-100 տարվա պատմություն ունի։
Դիվանագետը նաև նշել է, որ Խորհրդային Ադրբեջանի կազմում Արցախն ունեցել է ինքնավար մարզի կարգավիճակը, և այս փաստը պետք է բանակցային դաշտ բերվի։
