Ստրելկովը դժգոհություն է հայտնել Պուտինի՝ իշխանության ղեկին լինելու փաստի կապակցությամբ

Ռուսական հետախուզության նախկին աշխատակից, Դոնեցկում ռուսական զորքերի նախկին հրամանատար Իգոր Ստրելկովի (Գիրկին) կալանավորումը, ամենայն հավանականությամբ, կզայրացնի ռուսական հասարակության ռազմականամետ հատվածին: Այս մասին հաղորդվում է բրիտանական հետախուզության զեկույցում։

Բրիտանացիները նշում են, որ Ստրելկովը վաղուց է քննադատում Ռուսաստանի պաշտպանության նախարարությանը՝ Ուկրաինայի դեմ պատերազմ մղելու համար։ 
 

Սակայն վերջին օրերին նա ուղիղ քննադատության է ենթարկել ՌԴ նախագահ Վլադիմիր Պուտինին, այդ թվում՝ դժգոհություն հայտնելով նրա՝ իշխանության ղեկին լինելու փաստի կապակցությամբ։
 

Բրիտանական հետախուզության տվյալներով․ նախկին հրամանատարի համար պուտինյան ռեժիմի բացահայտ քննադատությունը պայմանավորված է Պրիգոժոնի նախաձեռնությամբ վագներցիների ապստամբության ձախողմամբ։

Գերատեսչությունը նշել է, որ Ստրելկովը հեղինակություն է վայելում ռուսական ռազմականամետ համայնքի շրջանում, որը նրան հարգում է 2014 թվականին Դոնբասում ունեցած «արժանիքների» համար։

«Այս քայլը (Գիրկինի կալանավորումը-խմբ․) հավանաբար վրդովմունք կառաջացնի ռազմական բլոգերների համայնքի և ռուսական բանակի ներկայացուցիչների մոտ, որոնք հիմնականում Ստրելկովին համարում են լայնախոհ ռազմական վերլուծաբան և հայրենասեր», - ասվում է բրիտանական հետախուզության մեջ:

Հիշեցնենք, որ նախօրեին Մոսկվայի դատարանը «ծայրահեղականության» կասկածանքով երկու ամսով նախնական կալանքի տակ էր ուղարկել Իգոր Ստրելյով-Գիրկինին։ 

Միաժամանակ, պատերազմի ուսումնասիրման ամերիկյան ինստիտուտի (ISW) վերլուծաբանները կարծում են, որ ՌԴ հետախուզության նախկին սպայի կալանավորումն այս պահին վկայում է Կրեմլի վերնախավի ներսում ուժերի հավասարակշռության կտրուկ փոփոխության մասին: 
 

Ըստ աղբյուրի, Ստրելկովը, ամենայն հավանականությամբ, հայտնվել է ռեպրեսիաների լայնածավալ ալիքի տակ, որի նպատակն է վերջնականապես ճնշել Ռուսաստանի իշխանությունների հասցեին ուղղված ցանկացած քննադատություն: