Ռուսաստանը պատրաստ է կազմակերպել ՀՀ-ի և Ադրբեջանի ԱԳ նախարարների հանդիպումը․ ՌԴ ԱԳՆ

Հայաստանի և Ադրբեջանի միջև խաղաղության համաձայնագրի անբաժանելի մասը պետք է լինեն Ղարաբաղի հայերի իրավունքների և անվտանգության հուսալի և հստակ երաշխիքները, ինչպես նաև Ռուսաստանի, Ադրբեջանի և Հայաստանի միջև եռակողմ պայմանագրերի ամբողջ փաթեթի խստիվ իրականացումը, ներառյալ՝ տրանսպորտային հաղորդակցությունների ապաշրջափակում և հայ-ադրբեջանական սահմանի սահմանազատման գործընթացի մեկնարկ: Այդ մասին ասվում է ՌԴ ԱԳՆ հայտարարության մեջ։

«Հաշվի առնելով վերը նշվածը՝ ռուսական կողմը հաստատում է Լեռնային Ղարաբաղի բնականոն կյանքի վերականգնմանն ուղղված միջազգային հանրության ջանքերին ակտիվորեն նպաստելու իր հանձնառությունը։ Մենք պատրաստ ենք մոտ ապագայում Մոսկվայում կազմակերպել արտգործնախարարների եռակողմ հանդիպում՝ քննարկելու ամենաբարձր մակարդակով պայմանավորվածությունների իրականացման ուղիները, այդ թվում՝ խաղաղության պայմանագրի համաձայնեցման թեման՝ հետագայում կազմակերպելով նաև բարձր մակարդակի հանդիպում Մոսկվայում խաղաղության պայմանագրի ստորագրման նպատակով»,- ասված է հաղորդագրության մեջ: