ՏԵՍԱՆՅՈՒԹ․ Մասկը Ցուկերբերգի հետ մենամարտից առաջ մարզվել է ջիու-ջիցուի սև գոտի ունեցող բլոգերի հետ

Ամերիկացի միլիարդատեր Իլոն Մասկը, պատրաստվելով Meta-ի հիմնադիր-ղեկավար Մարկ Ցուկերբերգի դեմ խառը մենամարտերի կանոններով (MMA) մենամարտին, ջիու-ջիցուի պարապմունք է անցկացրել հայտնի բլոգեր Լեքս Ֆրիդմանի հետ, որը ջիու-ջիցուի սև գոտի ունի: Այս մասին Ֆրիդմանը հայտնել է Twitter-ում։

«Երեկ հանպատրաստից Իլոն Մասկի հետ մի քանի ժամ տևողությամբ պարապմունք եմ անցկացրել: Ես չափազանց տպավորված եմ նրա ուժով, հզորությամբ, ոտքերով աշխատելու  հմտություններով: Դա էպիկական էր»,- գրել է նա:

Ըստ Ֆրիդմանի՝ «շատ ոգեշնչող է տեսնել, թե ինչպես են Իլոնն ու Մարկը մարտարվեստով զբաղվում, բայց ավելի լավ կլիներ ամբողջ աշխարհի համար, եթե նրանք պարզապես մարզվեին և չմենամարտեին ռինգում»։

Նա նաև կիսվել է լուսանկարներով, որտեղ Մասկն իրեն գետնին է նետում մարզումների ժամանակ։ Միլիարդատերը այս գրառմանը պատասխանել է՝ «Զվարճալի էր»։

Հիշեցնենք՝ աշխարհի ամենահայտնի միլիարդատերերից երկուսը` Tesla, SpaceX, Twitter ընկերությունների 52-ամյա ղեկավար Իլոն Մասկը և Meta-ի 39-ամյա ղեկավար Մարկ Ցուկերբերգը, պայմանավորվել են մենամարտել իրար դեմ:

Մասկը թվիթերյան իր միկրոբլոգի հարթակում հաղորդագրություն էր հրապարակել այն մասին, որ «պատրաստ է վանդակի մեջ կռվել Ցուկերբերգի հետ»: Դրանից հետո Ցուկերբերգը հրապարակել է Մասկի գրառման էկրանակադրը՝ «Ուղարկիր ինձ վայրը» մակագրությամբ։ Այնուհետև Մասկը Ցուկերբերգին պատասխանել է՝ «Վեգաս, Octagon»: Octagon-ը մրցավայր է, որն օգտագործվում է UFC մենամարտերի համար: