ՏԵՍԱՆՅՈՒԹ․ Ինչ է սպասվում «Վագների» խմբին․ Վլադիմիր Պուտինը հանդես է եկել ուղերձով
ՌԴ նախագահ Վլադիմիր Պուտինը հանդես է եկել ուղերձով, որում անդրադարձել է նախօրեին Ռուսաստանում «Վագների» խմբի կողմից կազմակերպված զինված ապստամբության փորձին։
Վլադիմիր Պուտինը շնորհակալություն է հայտնել ռուսաստանցիներին` դիմացկունության, միասնականության ու հայրենասիրության համար:
Նրա խոսքով` ցանկացած շանտաժ, ներքին խռովություն առաջացնելու ցանկացած փորձ դատապարտված է ձախողման:
«Զինված ապստամբությունն ամեն դեպքում կճնշվեր: Սահմանադրական կարգի ապահովման հստակ դիրքորոշում են որդեգրել հանրությունը, կուսակցությունները, կրոնական կազմակերպությունները, ողջ հասարակությունը»,- ասել է նա:
Պուտինը կրկնել է «Վագների» խմբին ուղղված իր առաջարկը` ցանկացողները կարող են պայմանագիր կնքել ՌԴ ՊՆ հետ` հայրենիքին ծառայություն մատուցելու համար, կարող են մեկնել Բելառուս կամ էլ վերադառնալ տուն։
Պուտինը շնորհակալություն է հայտնել նաև Բելառուսի նախագահ Ալեքսանդր Լուկաշենկոյին` առաջացած ճգնաժամի կարգավորման գործում իր ներդրման համար։
