Ավտովթար՝ Երևան-Մեղրի ճանապարհին․ ճանապարհը դարձել է միակողմանի երթևեկելի
Այսօր՝ հունիսի 14-ին, ժամը 16։07-ին Վայոց Ձորի մարզային փրկարարական վարչության ճգնաժամային կառավարման կենտրոն տեղեկություն է ստացվել, որ Ջերմուկ-Վայք ավտոճանապարհին տեղի է ունեցել ՃՏՊ․ կան տուժածներ։ Այս մասին հայտնել է ՀՀ ներքին գործերի նախարարության փրկարար ծառայությունը։
Պարզվել է, որ Երևան-Մեղրի ավտոճանապարհի 141-րդ կմ-ին բախվել են «Ford Transit» (վարորդ՝ Ս․ Հ․ ) և «Volkswagen Passat» (վարորդ՝ Գ․ Մ․) մակնիշների ավտոմեքենաները։
Փրկարարները «Volkswagen Passat» մակնիշի ավտոմեքենայի վարորդին և ուղևոր Լ․ Մ․-ին (ծնված 2005 թ.) մոտեցրել են շտապօգնության ավտոմեքենային, տուժածները հոսպիտալացվել են Վայքի ԲՄ, որտեղ բժիշկները նրանց առողջական վիճակը գնահատել են միջին ծանրության։
Նշվում է, որ ճանապարհը դարձել է միակողմանի երթևեկելի․ փրկարարները սահմանազատել են տարածքը։
