Անդրանիկ Թևանյանի փաստաբանական թիմը հայտարարություն է տարածել

Անդրանիկ Թևանյանի փաստաբանական թիմը վերաքննիչ քրեական դատարան է ներկայացրել բողոք՝ առաջին ատյանի դատարանի այն որոշման դեմ, որով Անդրանիկ Թևանյանի նկատմամբ կիրառված կալանքի ժամկետը երկարաձգվել է ևս երկու ամսով։ Այս մասին հայտնում են փաստաբանական թիմից։

Միաժամանակ, փաստաբանական թիմը բողոք է ներկայացրել նաև Վճռաբեկ դատարան՝ վիճարկելով Անդրանիկ Թևանյանի նկատմամբ կալանք կիրառելու վերաբերյալ առաջին դատական ակտը։

Հիշեցնենք՝ Թևանյանի նկատմամբ քրեական հետապնդում հարուցելու համաձայնություն ստանալու վերաբերյալ 2026թ. մայիսի 22-ին դատախազը միջնորդություն էր ներկայացրել Կենտրոնական ընտրական հանձնաժողով: Վերջինս բավարարել է դատախազության միջնորդությունը և տվել է համաձայնություն՝ Անդրանիկ Թևանյանի նկատմամբ քրեական հետապնդում հարուցելու, նրան ազատությունից զրկելու վերաբերյալ։

Հավելենք՝ Քննչական կոմիտեն 2026թ. մայիսի 21-ին հաղորդագրություն էր տարածել, որ քրեական վարույթ է նախաձեռնվել պետական դավաճանության և լրտեսության դեպքի առթիվ, որն առնչվում է ԱԺ նախկին պատգամավոր Անդրանիկ Թեւանյանին։